lutvam muchlu' qaStavIS qep'a' wa'maH vaghDIch.

lutvaD Da wej ghotpu':
     yempel Duy Da agent Yampell.
     tlhIngan be', Suy je Da 'ISqu' .
     tlhIngan loD  Da pagh.

yempel Duy Qu' pegh bop lut. tlhIngan nuH chu', lotjan, Suq 'e' nID ghaH.  

'IH jaj, qar'a', jay!

 

LUT 'AY' WA'

 ['el yempel Duy. QIn Hevpu'bogh nuD. laD.]

yempel Duy:
< yempel DuyvaD––QIn pegh: >
     < nuH chu' luchenmoHta' tlhInganpu' . <<lotjan>> ponglu'. >
< Qu'lIj chu':  Qo'noS yIghoS. DIvI' Duy peghvo' <<lotjan>> chovnatlh yISuq. >
< Qu'lIj mIw: >
     < qaStaHvIS 'op jaj veng wa'DIchDaq bIghIQ 'e' yIghet. >
     < ghIQwI'na' DaDameH nov DorwI' tum yIghoS 'ej nov DorwI' yISuq. >
     < DIvI' Duy pegh DaghommeH veng wa'DIch yoS ngo' yIghoS. >
     < nuHmey tIQ malja' yISam. bI'elDI' yIjatlh: <<'IH jaj, qar'a'? maja'chuqjaj!>> >
     < jangchugh Suy: <<jISaHbe'>> vaj DavoqlaH. Duyma' ghaH Suyvam'e'. >
     < ghaHvaD yIjatlh: <<SoHvo' vay' le' vIje' vIneH>>. >
     < mu'tlheghvam QoyDI' Suy, SoHvaD <<lotjan>> chovnatlh nob. >
< latlh De' potlh: >
     < Qu'vam luta' 'e' lunID jav Duymeyma'. luj Hoch. lujonlu'pu'. >
     < Duy SochDIj SoH vaj Qu'vamvaD <<Soch>> 'oH ponglIj'e'. >

[mon] jIDo'bej. Do'mo' mI' Soch, jIlujlaHbe'.

 

LUT 'AY' CHA'

[Qo'noSDaq]

['el tlhIngan be'. HaStaDaq ghItlh: <<nov DorwI' tum>>. ba'. 'el yempel Duy.]

 yempel Duy:
tagha' jIpawta'. DaH nov DorwI' tum vISamnIS. toH, pa' wa' vIleghlaw'!

[tum 'el]

tlhIngan be':
nuqneH, tera'ngan.

yempel Duy:
nov DorwI' vIpoQ. qaStaHvIS wej jaj veng wa'DIchDaq jIghIQ 'ej vogh vISuch vIneH.

tlhIngan be':
nov DorwI' jIH. qaDorqang. cholaj'a'?

yempel Duy:
er… er… er… naDev latlh nov DorwI'pu' tulu''a'?

tlhIngan be':
qaDorlaHchu' 'e' DaHon'a', tera'ngan?

yempel Duy:
er… Soch 'oH pongwIj'e'.

tlhIngan be':
cholajbe'chugh, Soch, chaq… lenglIj DatIvbe'.

yempel Duy:
vaj qalaj.

tlhIngan be':
maj. toH, Soch, veng wa'DIchDaq nuq Data' DaneH?

yempel Duy:
tumlIjvo' jImejDI' mebpa'meywIj vISamnIS. mebpa'mey wa'maH bIH.

tlhIngan be':
pa' qatlhejlaHbe'.

yempel Duy:
qatlh?

tlhIngan be':
muleghchugh mebpa'meyvam petaQpu' chaq… lenglIj DatIvbe'.

yempel Duy:
'ach chotlhejlaHbe'chugh chay' mebpa'mey vISam?

tlhIngan be':
ngeD mebpa'meylIj SammeH Qu'. pu'jInvam yIlo'. cha' pu'jIn.

yempel Duy:
cha' pu'jIn... cha' pu'jIn... jImIS. qatlh cha' pu'jInmey vIpoQ? yapbe''a' wa'?

tlhIngan be':
yapbej wa'.

yempel Duy:
vaj qatlh <<cha' pu'jInmey>> bIjatlh?

tlhIngan be':
choyajHa'ba', Soch. <<cha' pu'jInmey>> jIjatlhbe'. <<cha' pu'jIn>> jIjatlh. pu'jInDaq mebpa'meylIj lucha'lu'. mebpa'meylIj cha' pu'jIn. [pu'jInDaq vay' SIq] yIlegh, Soch. naDev maH 'ej pa' bIH.

 yempel Duy:
DaH jIyaj. Sumqu' mebpa'mey.

tlhIngan be':
mebpa'meylIjDaq pa' DaSuqDI' nuq DaSuch DaneH?

yempel Duy:
naDev HoS lIngwI'mey law' lutu'lu', qar'a'? chaq DaHjaj pov DISuchlaH.

tlhIngan be':
wej DISuchlaH.

yempel Duy:
DaHjaj wej DISuchlaH… DaHjaj wej DISuchlaHchugh chaq wa'leS DISuch.

tlhIngan be':
wa'leS je wej DISuchlaH.

yempel Duy:
jIyajbe'. jImIS. noyqu' veng wa'DIch HoS lIngwI'mey. HoSghaj, 'IH. bIH leghmeH naDev paw novpu' law' vaj qatlh DISuchlaHbe'? DaHjaj DISuchlaHbe', wa'leS DISuchlaHbe', chaq cha'leS DISuchlaHbe' je. vaj ghorgh DISuchlaH jay'?

tlhIngan be':
bImISbej, Soch. reH DISuchlaH. DaHjaj DISuchlaH, wa'leS DISuchlaH, cha'leS DISuchlaH je.

yempel Duy:
vaj qatlh bIjatlh <<wej DISuchlaH>>?

tlhIngan be':
choyajHa'ba', Soch. DISuchmeH maloSnISbe' 'ach Hoch HoS lIngwI'mey DISuchlaHbe'. wej neH SuchlaH novpu'. DaH bIyaj'a'?

yempel Duy:
DaH jIyaj. toH, wa'leS wej HoS lIngwI'meyvam vIlegh vIneH.

tlhIngan be':
lu'. 'ej cha'leS nuqDaq wIghoS?

yempel Duy:
cha'leS tlhIngan yejquv vaS'a' vIghoS vIneH.

tlhIngan be':
lu'. 'ach yIloSrup, Soch: cha'leS wIghoSchugh wI'elmeH maloSnIS.

yempel Duy:
qatlh SIbI' wI'ellaHbe'?

tlhIngan be':
ghom'a'mo'. cha'leS yejquv vaS'a'Daq qaS wanI' le'. wanI'vam lubejmeH pawbej nuvpu' law'. romuluSngan yo' naQ charghta'bogh HoDpu''e' naD voDleHma'. loS HoDpu'vam'e' legh neH ghom'a'.

yempel Duy:
<<loS HoDpu'vam 'e' legh neH ghom'a'…???>> jImISqa'. Daj 'ej potlh HoDpu' naDtaHghach wanI', vaj lulegh luneHba' nuvpu' law'. 'ach loSnISchugh vay', Dal 'ej ram wanI'vam. qatlh loSbogh HoDpu' leghmeH paw nuvpu' law'? 'ej wa' latlh ngoD vIyajbe'. qatlh loSnIS HoDpu'?

tlhIngan be':
choyajHa'qa'ba', Soch. jIQum 'e' vIHechbe': <<loSbogh HoDpu'vam legh neH ghom'a'>>. jIQum 'e' vIHech: <<loS HoDpu''e' lunaDlu'bogh leghmeH paw ghom'a'>>. DaH bIyaj'a'?

 yempel Duy:
DaH jIyaj. HoDpu' vIlegh vIneH jIH je. chaq wa' HoD ghaH HoD Qanqor noy'e'. qaStaHvIS poH nI' vIghom 'e' vItul 'ach not Daq rapDaq maHlaw'.

tlhIngan be':
HoD Qanqor? tu'HomI'raHvetlh buD? not romuluSngan jonta'! toH, Soch, latlh Daqmey DaghoS DaneHbogh tulu''a'?

yempel Duy:
wa' neH, veng wa'DIch yoS ngo'.

tlhIngan be':
lu'. cha'leS yoS ngo'Daq qaDevlaH.

yempel Duy:
choDevnISbe'. pu'jIn vInuDlaH 'ej nIteb vIghoSlaH.

tlhIngan be':
qatlhej qatlh DaneHbe', Soch? qaDorlaHchu'. qaboQlaHchu'. qaDortaHvIS bIbel. qama' vIneH.

yempel Duy:
nuqjatlh? qama' DaneH? qatlh? HeSwI' jIHbe'!

tlhIngan be':
yIjotchoH, Soch. bImISbej. SoH qama' jIH vIneH: ghIQwI' vIDorbogh vIma' vIneH. jav vIneHbe'.

yempel Duy:
DaH jIyaj. tlho'. DorwI' nIv SoH 'e' vIHonbe' 'ach nIteb yoS ngo' vIghoS vIneH.

tlhIngan be':
lu'. 'ach yIqaw, Soch: yoS ngo'Daq qatlhejbe'chugh ... chaq Do'Ha'.

yempel Duy:
Eh… eh... toH, wa'leS naDev maghom, qar'a'?

tlhIngan be':
HIja'. wa'leS naDev maghom. yIpaSQo', jay'!

[HastaDaq ghItlh yempel Duy: <<Qu' yI'el>>. mej.
'oH HaD be', ghIq mu'tlhegh bIngDaq “ENTER MISSION” ghItlh.
DIvI' Hol mu'mey nuD. lughmoHmeH ghItlh “INTERMISSION.” mej.]

LUT 'AY' WEJ

 [qaSpu'DI' cha' jajmey, veng wa'DIch yoS ngo'Daq]

 [quS cha'DIch raS je lucherlu'.]

 ['el tlhIngan be'. qab jech tuQ. ngaSwI' tIn qeng. raSDaq ngaSwI' lan.
HaStaDaq ghItlh: <<nuHmey tIQ malja'>>. raS 'er'InDaq ba'.
'el tlhIngan loD. raS megh'anDaq ba'. 'el yempel Duy.]

yempel Duy:
toH, rIn ghIQlaw'ghach. tagha' Qu'wIj vIta'laH. nuqDaq 'oH nuH tIQmey malja''e'? toH pa' vIlegh.

 [malja' 'el. qoDDaq tlhIngan loD legh.]

yempel Duy:
'IH jaj qar'a'? maja'chuqjaj!

 [jangbe' loD. yempel Duy qImHa'law'.]

yempel Duy:
[jatlh'egh] chaq pe'vIl jIjatlhnIS. [nuvvaD] <<'IH jaj, qar'a'? maja'chuqjaj!>>

 [loD merlaw'. mInDu' poSqu'moH loD.]

tlhIngan loD:
nuqjatlh?

yempel Duy:
[QeHchoH] <<'IH jaj, qar'a', jay'!>>

tlhIngan loD:
qayajbe', tera'ngan. 'Iv SoH? nuq DaneH?

yempel Duy:
Soch 'oH pongwIj'e'. DaH bIyaj'a'?

tlhIngan loD:
Soch?! pong 'oHbe'! mI' 'oH! mI' pong ghaj 'Iv? Doghqu'!

yempel Duy:
naDev 'oH nuHmey tIQ malja''e', qar'a'?

tlhIngan loD:
ghobe'. naDev 'oH HoSDo' ropyaH'e'.

yempel Duy:
Qu'vatlh!

 [mej yempel Duy]

yempel Duy:
nuqDaq 'oH malja''e' vIneHbogh jay'?

 [latlh malja' legh]

yempel Duy:
toH, chaq pa' 'oH.

[malja' 'el. Suy tu'lu'. qab jech tuQ.]

yempel Duy:
[jatlh'egh] jum. qatlh qabDaj So' Suy?

Suy:
nuqneH, tera'ngan.

yempel Duy:
[jatlh'egh] ghoghvam vIghovlaw'. 'Iv ghaH Suyvam'e'? [SuyvaD] 'IH pov, qar'a'? maja'chuqjaj!

Suy:
HIyIvQo', petaQ! bIjatlhHa'chugh vaj bIpay.

yempel Duy:
[jatlh'egh] qejbej Suy. tlhInganna' Da.  [SuyvaD]  'IH pov, qar'a'? maja'chuqjaj!

Suy:
[QeHchoH. Qam.]  jIjatlhqa': HIyIvQo', petaQ, jay'! naDevvo' yIghoS!

 [mISqu' yempel Duy. vIHbe'. malja' HurDaq yempel Duy yuv Suy.]

yempel Duy:
[ghaH yuvlu'taHvIS Suy]  'ach... 'ach...

[malja' HurDaq]

 

yempel Duy:
jIyajbe'. mu'tlhegh pegh vIjatlh, qar'a'? qatlh jangbe' Suy? DIvI' Duy ghaHbe''a'? [Qub] toH!  mu'tlhegh pegh vIqawHa'pu'! va!

 [malja' 'elqa']

Suy:
yIyep, tera'ngan, bIjatlhHa'qa'chugh vaj bI'oy'.

yempel Duy:
'IH pem, qar'a'? maja'chuqjaj!

Suy:
[QeHqu'choH]  quvwIj DatIchlaw', tera'ngan. SIbI' yImej jay'!

 [malja'vo' ghoSqa' yempel Duy]

yempel Duy:
Qu'vatlh! mu'tlhegh pegh vIjatlhHa'qa'ba'. va! va! va! jIQubnIS.  [QubchoH, pe'vIl Qub. tagha' QuchDaj qIp]  toH! DaH vIqaw.

 [malja' elqa']

Suy:
nuqneH!

yempel Duy:
'IH jaj, qar'a'? maja'chuqjaj!

Suy:
jISaHbe'.

yempel Duy:
SoHvo' vay' le' vIje' vIneH.

Suy:
jIHvo' vay' le' DaneH?  [qab jech teq. Soch nov DorwI' ghaH. ngaSwI'vo' nuHDaj lel. mon. yempel DuyDaq nuHDaj SIq. yay'choH yempel Duy. nuj, mInDu' je poSqu'moH. ghopDu' pep]  le''a' vay'vam, Soch? toH, DIvI' ghoqwI', qajonta'. qama'wI' SoH. qaja'pu', qar'a', <<qatlhejbe'chugh chaq Do'Ha'>>?

yempel Duy:
jIyajbe'. naDev SoH? chay'?

Suy:
reH DIvI' ghoqwI' jonrup tlhIngan wo' Duyna'.

yempel Duy:
'ach nov DorwI' tumDaq bIjatlh <<jav vIneHbe'>>. bIvItbe''a'?

Suy:
jIvItbej. jav vIneHbe'. jav qama'pu' vIghaj. naDev malja'vamDaq jav ghoqwI'pu' vIjonta'. 'ach Duy SochDIj SoH, qar'a', Soch? toH, jav vIneHbe'. Soch'e' vIneH!