DIS cha'SaD loS, jar cha' Qo'noS QonoSDaq lutvam muchlu'.

bangoy!

qonta' 'ISqu'

 rut bIrchoH SuvwI' 'Iw. 'ach rut bomchoH. bang DalarghDI' tlhInganna' DaDarup'a', laDwI'?

munbe'chugh veqlargh banglI' 'Iw DabomchoHmoHlaH. vay' neHbogh chargh SuvwI', qar'a'? parmaqqaylI' mojDI' nuv DamuSHa'bogh chay' Suvang, SoH ghaH je? 'utbe' bel net Sov 'ach
'utbej quv. batlh ghob bopab 'e' vIHonbe'. be' SoHchugh, laDwI', banglI' Datlhu'moHmeH
wab <ghghgh> Dajatlhqu'ba' 'ej pe'vIl ghaHDaq Dochmey 'ugh DajaD. loD SoHchugh
ghaytan bIjuntaHqu' 'ej parmaqqaylI'vaD bommey Dun Damuch. 'ach tlhIngan tIgh bopabchu'meH bang pongmey bowIvnISbej.

novpu' vuQlaw' tIghvam 'ach De' yap lughajbe'bej. pegh bang pongmey. loQ tIghvam Del wa' paq neH. wej pong Seghmey lo'law' tlhInganpu': Soj permey, nuH permey, porgh 'ay'Du' permey je. 'ach chay' pongmeychaj wuq muSHa'chuqbogh tlhInganpu'? 'op bang pongmey qel paq 'ach pong wIvlu'meH mIw Delbe'. chaq potlhbe' meq. chaq potlhqu'. naDev meqmey Sar vIqel 'e' vInID. vIqeltaHvIS, mu' <chaq> vIlo'qu' 'e' botu'. yapbe'bej SovwIj je. wa' bang pongHey neH vISov. wa' loD noy lubuStaHvIS mu' <nImoy> lulo' loDvam ngotlhwI'pu' law'. 'ach tlhIngan ghaHbe' loDvam'e' 'ej tlhIngan chaHbe' je ngotlhwI'pu'Daj'e' vaj tlhInganpu'na' Dabe'. 'ej ghaytan bang pong 'oHbe' pongvam'e'.

qeSmey puS vIghaj 'ach HIyajHa'Qo', laDwI'! SoHvaD pagh vIchup jay'. bang pongmey
bowIvmeH SoH parmaqqaylI' je, meqmeyraj bongu'nIS.

 toH, val'a' parmaqqaylI'; Huy' rur'a'? chaq ghaHvaD pong <Huy'oy> DaqellaH. Dunlaw' je pong <QoghIjoy>. HoS'a' parmaqqaylI'; 'Iw rur'a'? toH, chaq <'Iwoy> mojqang. ghaHvaD qar je pong <Somrawoy>. banglI'vaD <jorwI'> DaDaqangchugh chaq SoHvaD mu'vam DawIvlaH. chaq SoHvaD <yuch> Da banglI' DaneH. vaj ghaHvaD bIjatlhtaHvIS mu' <yuchoy> Dalo'laH. DuchechmoHlaw'chugh parmaqqaylI' chaq ghaHvaD <HIqoy> Dawuqta'. DatlhuHmoHchugh ghaH chaq SoHvaD <taghoy> wuqta'. jIloyba' neH. chaq qarbe' meqmeyvam.

chang'eng luchenmoHbej nuv parmaqqayDaj je. chang'engmey chenmoHlaw' je mu'mey law':
<ro' - ghIt>, <tal - ngat>, <nuj - jat>, <tlhatlh - 'uSu'>, <qagh - ghevI'>, <jIb - pob>, latlh je.
toH, chang'eng <tal - ngat> bowuqchugh <taloy> moj 'Iv, <ngatoy> moj 'Iv? nger le'
lughaj Human tejpu'. nuQubmoH mu'mey 'e' maq ngervam. mu' lo'lu'DI' qechmey Dolmey
nuvpu' joq DIbuSchoH. chay' nuQubmoH mu'mey? maq ngervam: jejbogh 'ej jeqbogh Dochmey 'oS 'op mu'. mu'meyvam lulo'lu'DI', loD wIbuS. Dochmey chIm, gho rurbogh Dochmey'e' joq 'oS ' op mu'. mu'meyvam lulo'lu'DI', be' wIbuS. lughchugh ngervam loD 'oSlaw' <ghonDoq>, <tajtIq>, <'alngegh>, <qutluch>, <jat>, <chanDoQ>, <pach>, latlh law' je. be' 'oSlaw' <tal>, <peng>, <burgh>, <chab>, <qevpob>, <nuj>, <'I'>, latlh je. toH, tlhIHvaD chang'eng <nuj - jat> bowIvchugh, loDvaD QaQlaw' <jat>, be'vaD QaQlaw' <nuj>.

'ach ghaytan Human ngermey DaSaHbe', laDwI'. nonglaH Humanpu', 'ach motlh bIQ lurur:
puj HochHom. rambej qechmeychaj 'ej taQ 'e' luHar tlhInganpu' law' 'ej nov qechmey buSHa'. DujDaj voqnIS tlhInganna'. bang pongmey pup bowIvtaHvIS, SoH banglI' je, lISIghnIS
tlhIngan meqmey. 'IHqu' tlhIngan Hol 'ej lIpIlmoHlaHbej. SuH, mu'mey <tIq>, <Quch>, <betleH>, <meqleH> tIqel, laDwI'. tlhInganvaD nIvlaw' 'e' vIHar: nonglaw' <tIq>, Hemlaw' <Quch>, qar'a'? quvbej <betleH> 'ej matlhbej <meqleH> net tu'bej. natlhlaw' mu'mey: <bIQ>, <Hom>, <yeb>, <ngIb>, <ghaw'> je. HoS luHo'mo' tlhInganpu', bang pongmey qeltaHvIS,
ghaytan mu'mey <bIQ> <Hom> je lajQo'. pujwI'vaD neH qar pong <bIQoy>. jaghlI' DaHommeH neH, ghaHvaD per <Homoy> Dalo'laH. banglI'vaD pongvam DawIvchugh, Seng yIghuH. <yeboy> <ngIboy> ghap Dupongchugh vay' quvlIj tIchbej. <ghaw'> vIpar? toH, Soplu'meH 'eylaH ghaw' vutlu'chu'ta'bogh 'ach jeQHa'wI' 'oSlaHmo' je mu'vam, <ghaw'oy> mojqangba' pagh. jeQ, qar'a', tlhInganpu'? banglI'vaD pong <ghaw'oy> DawIvchugh, DabelHa'moHba'.

pe'vIl ghob 'ej pe'vIl Holchaj lulo' tlhInganpu' quv. vaDchu'chugh vay' pIj ghaH Dellu'meH
<pe'vIl roS> jatlhlu'. toH, pe'vIl bIroSchugh ghaytan DuDellaHchu' pong <roSwI'oy>.
pIj 'oy'qu'chugh Qay'wI'lIj chaq <Qay'wI'oy> DamojnIS. parmaq SIQtaHvIS vay',
rut ghojmoHwI' wamwI' joq rur. toH, parmaqqaylI' DachuH DaneHchugh, vaj SoHvaD
povbej pongmey' <ghIntaqoy> <naQjejoy> je.

napnIS'a' bang pong? 'e' poQ'a' tIgh? jISovbe'. tlhoy Qatlhmo' ghaytan <boqrat chej
Qevlu'pu'bogh> wIvqang qoj wIvlaH pagh. pong DameH chaq tlhoy tIq <ro'qegh'Iwchab>.
'ach DIch vIHutlh. chaq ghItlhHomvam vIqontaHvIS tIqlIj meQmoHtaH <ro'qegh'IwchaboylI'>.

toH, nIpIlmoH'a' qechmey vImuchta'bogh, laDwI'? <HISlaH> bIjatlh'a'? wejpuH.
ngeD DuSIghmeH Qu'. <ghobe'> bIjatlh'a'? maj. tIqlIj jonlu'pu' 'ach tlhabba' yablIj.
bIwuqmeH DuboQnIS pagh.

HoSghajbej parmaq. HoSghaj je mu'mey. qeylIS luqara' je boDataHvIS, SoH bangoylI'je,
pe'vIl Hol yIlo'!